Árlega látast um það bil eitt þúsund Svíar úr krabbameinum sem rakin eru til áfengisneyslu.

Samkvæmd nýrri skýrslu sem gefin hefur verið út á vegum sænsku læknasamtakanna (SLS), bindindissamtakanna IOGT-NTO í Svíþjóð og rannsóknamiðstöðvarinnar CERA við Gautaborgarháskóla og kynnt var í dag látast árlega um það bil eitt þúsund Svíar úr krabbameinum sem rakin eru til áfengisneyslu. Dauðsföllum af krabbameinum sem rakin eru til áfengisneyslu hefur fjölgað um 7,3 prósent í Svíþjóð frá árinu 2001.

Sterkust er fylgnin á milli áfengisneyslu og krabbameina í ristli og endaþarmi hjá körlum og brjóstum hjá konum. Meira en tíu prósent af öllum dauðsföllum úr brjóstakrabbameini í Svíþjóð eru rakin til neyslu áfengis.

Í skýrslunni kemur einnig fram að Svíar eru sú þjóð innan Evrópusambandsins sem hefur minnsta þekkingu á tengslum áfengis og krabbameina. Minnt er á þá skyldu að upplýsa almenning og þá sem móta stefnu í lýðheilsumálum um skaðsemi áfengisneyslu en ný þekking á þessu sviði hafi ekki leitt til aukinnar fræðslu og upplýsingamiðlunar.

Í fréttatilkynningu sem fylgir útkomu skýrslunnar segir Stefán Lindgren, formaður SLS, að ,,þrátt fyrir að áfengi sé helsti áhættuþáttur krabbameina á eftir tóbaki sé þekking á því meðal heilbrigðisstétta takmörkuð. Læknar og annað heilbrigðisstarfsfólk verði að upplýsa sjúklinga betur um áhættu af áfengisneyslu“.

Skýrslan er sú nýjasta í röð skýrslna um áfengi og samfélag. Hana má lesa hér.