Kallað eftir markvissum aðgerðum til þess að draga úr áfengisneyslu

Ráðuneyti félags- og heilbrigðismála í Finnlandi sendi í síðustu viku frá sér greinargerð sem ætluð er sem grunnur að endurskoðun á áfengislögum þar í landi. Takmarkanir á aðgengi að áfengi er lykilatriði að mati ráðuneytisins. Meðal ráðstafana sem ráðuneytið kallar eftir í því skyni eru styttri sölutími áfengis, hærri áfengisgjöld og lækkun leyfilegs áfengismagns í bjór og öðrum áfengum drykkjum sem seldir eru í verslunum.

Í greinargerðinni er einnig lagt til að sala áfengis verði bönnuð á sunnudögum og helgidögum og sölutími áfengis almennt styttur.

Áfengisgjald í Finnlandi var lækkað árið 2004, en hækkaði aftur á árunum 2008-2012. Leggur ráðuneytið til að gjaldið verði í framtíðinni hækkað reglulega á tveggja til þriggja ára fresti. Þá er lögð til tilkynningaskylda á meiriháttar innflutning á áfengi. Með því að ætlunin að stöðva ólöglegan innflutning áfengis, einkum frá Eistlandi.

Áhrifaríkasta leiðin til að draga úr áfengisneyslu, samkvæmt areinargerðinni, er að takmarka leyflegt áfengismagn í bjór og öðrum áfengum drykkjum sem seldir eru í almennum verslunum við 3,5% að hámarki og fylgja með því fordæmi Svía. Ráðuneytið leggur til að gripið verði til þessa ráðs þótt öðrum leiðum sem lagðar eru til verði hafnað.

Á aðeins einni mannsævi hefur neysla áfengis meðal karla í Finnlandi tvöfaldast og sexfaldast meðal kvenna. Ráðuneytið kallar eftir markvissum aðgerðum til þess að draga úr neyslunni og bendir á sem verðugt markmið að ná meðalneyslu af hreinum vínanda niður í 8 lítra fyrir árið 2020. Neyslan nemur nú 9,7 lítrum. Drög að nýjum lögum um áfengi verða líklega lögð fyrir finnska þingið vorið 2014.

Sjá hér.